الشهر الرابع للحمل

فين الجنين؟

الجنين بقى نشيط أكتر: ممكن تبتدي تحسي بحركته وهتكون الأحاسيس  دي خفيفة في بدايتها زي جناحات الفراشة أو فقاعات في المعدة، ممكن برضه ماتحسيش بحاجة في  اللحظة دي، بس استني... مش هتطول كتير. دلوقتي الجنين يقدر يفتح بقه ويحرك عينيه ويعمل تعبيرات بوشه ويحرك صباعه جوه بقه ويمصه.

حاسة اللمس هتكمل في التطور عنده وهتبدأ الشبكية في شغلها، وهتبدأ حاسة التذوق تتطور وده بسبب "الجسيمات اللمسية"، ودي مناطق صغيرة جدا وحساسة على الجلد. لازم تستني لمدة 24 أسبوع لحد ما تظهر الجسيمات دي، وتفضل كده لحد ماينضج الجهاز العصبي للجنين. حاسة الشم برضه بتكبر شوية شوية، بس الجنين مش هيبقى بيعرف يفرق بين الروايح المختلفة غير لما يتم الشهر السابع، وهيبدأ يدوق بفضل نكهة السائل السلوي واللي بيختلف حسب نوعية الأكل اللي بتاكليه. وأخيرا مع بداية الأسبوع ال15 للحمل هيبدأ الجنين يسمع صوت نبضات قلبك والمعدة وبالذات صوتك عن طريق السائل السلوي، وتقدري تتكلمي معاه وتطمنيه حتى لو ماكانش قادر إنه يفهم.'

العادات الغذائية الكويسة

الغثيان وفقدان الشهية في الفترة الأولى من الحمل حاجة عادية وهتنتهي قريب، أنتي بتعيدي اكتشاف شهيتك وتقدري تستفيدي من ده. استمتعي بوقتك من غير مبالغة، وعلى قد ما زيادة الوزن حاجة طبيعية؛ بس مفيش قاعدة ثابتة: كل حاجة بتعتمد على وزن جسمك وحالتك الصحية ومعدل الحرق... في المتوسط، الوزن المثالي ممكن  يزيد من 300 إلى 350 جم في الأسبوع في الفترة التانية وهيكون الدكتور قادر يقولك إيه المناسب معاكي.

خدي بالك لما بتاخدي اليود، هو ضروري عشان الغدة الدرقية تشتغل بشكل سليم، و المعدن ده موجود في الأكل وبالذات الملح. ماينفعش تستخدمي الملح كتير. مفيش ضرورة إنك تحطي الملح على كل حاجة عندك في الطبق ، الموضوع ليه علاقة بالتوازن السليم. ما تتردديش في سؤال الدكتور عشان تعرفي معلومات أكتر.

سؤال الشهر: أنا حاسة إني نفسي آكل حاجة حلوة– إيه اللي لازم أعمله؟

الحلم بتورتة الفراولة أو بموس الشوكولاتة وقت فترة الحمل هو حاجة ممكن تحصل عادي جدا، ومرة تانية فالهرمونات هي المسئولة عن الشعور ده. هو لازم أستسلم للرغبات دي؟ آه، من وقت للتاني بس في حدود المعقول بس، وطول ما انتي ملتزمة بعادات غذائية متنوعة ومتوازنة، فأحسن حل عشان تعوضي السكريات هو إنك تاكلي الفاكهة الطازة أو المجففة، والحلويات المصنوعة من اللبن (مش الكريمة) والزبادي الطبيعي، كمان تقدري تاكلي المنتجات "البسيطة" بكميات قليلة: زي إنك تاكلي قطعة من الشوكولاتة الغامقة بدل قطعة من الكيك المليان بالسكر والسعرات الحرارية.

لسه الجنين جوه فقاعة في بطنك، و أعضاؤه الحيوية لسه مكملة تكبر ثانية بثانية. فضولك هيخليكي عايزة تعرفي نوع الجنين بتاعك، اصبري، جلسة الفحص بالموجات فوق الصوتية التانية متحدد ليها الشهر الجاي.