الأسبوع الثالث عشر من الحمل

نمو الجنين

دلوقتي وزنه بقى حوالي ٣٠ جرام وطوله من الراس لآخر العمود الفقري بقى حوالي ٧ سم. يقدر يتني صوابعه، ويفتح ويقفل بؤه ،ويشفط السائل الأمنيوسي المُحيط بيه عن طريق جهازه الهضمي واللي بيتم إفرازه بعد كده في البول من خلال الكلى اللي بتشتغل حاليًا أحسن بكتير. بدأ جلده يصنَّع مادة الميلانين المسئولة عن لون بشرته بعد الولادة. الهيكل العظمي لسه بيتكوّن تدريجيًا.

جسمك

آلام الحمل بتاعت الأسابيع اللي فاتت هتبتدي تختفي. أخرجي وأتحركي وأتمشي وأبسطي نفسك. أقعدي في الشمس اللي هي مصدر فيتامين د لأنه بيحسّن الحالة النفسية والبشرة. بمناسبة البشرة، هتلاحظي إن بشرتك بتحلّو بسبب الهرمونات اللي بيفرزها جسمك خلال الحمل...ممكن يطلع لك بقع بني على قورتك أو خدودك وهتختفي بعد حوالب ٣ شهور من الولادة ومالهاش علاقة بإنك حامل في ولد ولا في بنت زي ما كتير فاكرين.

نظام أكلك

السمك مصدر هايل للبروتين لكن فيه أنواع سمك فيها نسبة عالية من الزئبق وده خطر جدًا على الجنين. تجنبي السمك الني (السالمون، التونة، السوشي) وتجنبي سمك أبو سيف وسمك مارلين وسمك سيكي وسمك الراهب وتعبان البحر والدنيس والورنك والبوري.  

نصايحنا

مش لازم تنزلي تشتري حاليًا لبس جديد أوسع بس المهم إن مقاس الـ "برا" يبقى أكبر ومريح لصدرك.