الأسبوع الحادى والثلاثون من الحمل

نمو الجنين

وزنه بقى نص وزنه المتوقع لما هيتولد وبقى يتحرك ناحية المكان اللي هيتولد منه. فيه ٩٥٪ من الحالات، الطفل بيتولد وراسه لتحت لكن لو الدكتور لقي – وده عادي – إنه مش في الوضع السليم للولادة، بيحاول يلاقي حلول وممكن يقرر إن الولادة تبقى بعملية قيصرية.

جسمك

طبيعي إن حجم صدرك يكبر وخليكي حريصة إن مقاس الـ "برا" يبقى مريح ومناسب. فيه ستات، صدرها بينزِّل لبن الفترة دي كاستعداد جسماني للرضاعة، اللبن ده اسمه "لبأ" وده اللي هيمد طفلك في أول أيامه بكل الأجسام المضادة اللي هتقوّي مناعته. ممكن تشتري زي مخدات صغيرة بتتحط جوا الـ "برا" علشان ما تتعرضيش لبلل يضايقك باقي اليوم.

نظام أكلك

بيزيد وزن طفلك جواكي حوالي كيلو نص لحد الولادة يعني بمعدل ٢٠٠ جرام تقريبًا في الأسبوع...ده معناه إن هيسحب منك على قد ما يقدر كل اللي محتاجه بشكل مكثف، مش معنى كده إنك تكتّري الكمية اللي بتاكليها إنما تحاولي تلتزمي كل يوم بنظام غذائي فيه بروتين وكالسيوم وفاكهة وخضار وزيوت طبيعية ومسكرات. لو الدكتور نصح بكملات غذائية برضه خديها.

نصايحنا

هي معلومة أكتر من نصيحة؛ مفيش أي علاقة بين حجم الصدر والقدرة على الرضاعة بشكل كافي. الرضاعة متوقفة على قدرة الطفل على الشفط. ما تشغليش بالك بتخيلات مالهاش أي أساس علمي.