الأسبوع العشرون من الحمل

نمو الجنين

نموه بقى سريع وخصوصَا خلايا الدماغ. جسمه بيكبر ودلوقتي راسه أصغر من حجم جسمه. لو حامل في بنت، فـ المبيضين بقوا مجهزين بخلايا بدائية تكفي لإنتاج ٦ مليون بويضة وهيبدأ العدد ده يقل لحد ما يوصل لمليون بويضة ساعة الولادة. البنكرياس بدأ ينتج الأنسولين وده الهرمون اللي بينظَّم مستوى السكر في الدم طول العمر وبيسمح لطفلك باستخدام السكر والدهون للنمو اللي بيتخزنوا تحت جلده لحد الولادة.

جسمك

لما تحسي إن طفلك بيتحرك جواكي ممكن تنامي على ضهرك علشان تحسي بالحركة بشكل أوضح وممكن انتي كمان تتمشي أو تتحركي...الهزات اللي بتوصل له بتهدّيه وتخلّيه ينام. لو لسه مش حاسة بأي حركة منه جواكي، فماتقلقيش..الحركات بتبقى واضحة جدًا من أول الأسبوع الخمسة وعشرين.

نظام أكلك

الفلوريد مهم لأسنانك وأسنان طفلك في المستقبل. فيه دراسات بتأكد إنخفاض نسبة التسوس بمقدار ٣٥٪ عند الأطفال اللي عندهم ٦ سنين وأمهاتهم كانوا بيشربوا مياه فيها فلوريد خلال فترة الحمل. بشكل عام، أغبلنا بقى يشرب مياه معدنية ودي فيها فلوريد، وممكن تاخديه من خضار زي السبانخ والخس، ومن الفواكه خصوصًا التفاح. 

نصايحنا

فيه مخاوف كتير من القطط خلال الحمل لأنها ممكن تسبب مرض "التوكسوبلازما" واللي بيعتبر خطر وقاتل للجنين. نعتقد إن لو عندك قطط، مش لازم تمشّيهم لأن المرض بيتنقل عن طريق فضلات القطط مش القطط نفسهم، فممكن تخلي حد غيرك يبقى مسئول عن نضافتهم وتغسلي إيدك دايمًا بعد ما تلمسيهم.