الأسبوع الواحد وعشرين من الحمل

نمو الجنين

بتستمر حواس الشم والتذوق في التطور. السائل الأمنيوسي المُحيط بيه بيوّصل له طعم اللي بتاكليه والريحة اللي حواليكي، علشان كده بعد الولادة بيبقى مُنجذب لريحة جلدك وللبن بتاعك وللطعم الحلو (لأن السائل الأمنيوسي طعمه حلو) وكل الأكل اللي بتاكليه بانتظام في أواخر فترة الحمل بيتاخد على طعمه وبيبقى مألوف له.

جسمك

بيحصل لبعض الستات الحوامل انتفاخ في الرقبة وبتبقى أتخن من الطبيعي لأن الغدة الدرقية بتنتفخ مع البطن والصدر. حاولي الفترة دي تلبسي حاجات واسعة من عند الرقبة.

نظام أكلك

هتحسيبتقل في رجلك خصوصًا لو الجو حر اللي بيعلّي الدورة الدموية في الأوردة، شرب المياه الكتيربيساعد على تخفيف الشعور ده وما تلبسيش كعب عالي. نامي على جانبك الشمال علشان تخففي الضغط على الأوعية الدموية وعلى طفلك، ووجهي مياه ساقعة على رجلك وانتيبتاخدي دوش.

نصايحنا

لو بتعاني من عسر الهضم فده بيحصل نتيجة إن التغييرات الهرمونية الفترة دي بتخلّي فتحة الجزء العلوي من المعدة متكاسلة فيبقى سهل وصول أحماض المعدة للمريء وده اللي بيسبب شعور بالألم وعدم الراحة ساعة الأكل أو بعده. للأسف كل ما ابنك يكبر جواكي أكتر، كل ما الضغط على المعدة يزيد أكتر، وكل ما الألم ده هيزيد. نصيحتنا إنك تحاولي تاكلي دايمًا أكل صحي وخفيف، وتاكلي خمس وجبات في اليوم بدل من تلات وجبات كبيرة. تمضغي كويس وببطء. لو بتحسي بألم ساعة النوم، نامي وراسك مسنودة بحيث الأحماض ما تتطلعش بسهولة وتسبب لك ألم وبالتالي الأرق.