إزاي أحافظ على كمية اللبن خلال الرضاعة

حقيقي إن طعم لبن الأم متوقف على اللي بتاكله ولكن كمية اللبن اللي هينزل متوقف على قدرة الشفط عند الطفل. يعني اللي تقدري تتحكمي فيه هو الطعم مش الكمية، والأكل اللي بتاكليه مهم يبقى متنوع علشان ده بيكوّن حاسة التذوق عن ابنك، فـ كل ما تنوّعي أكتر، كل ما هيقدر يتعرف على طعم أكلات أكتر.

2دقيقة للقراءة فبراير 3, 2020

انتي مش محتاجة تاكلي ضعف اللي بتاكليه، انتي محتاجة تاكلي اللي يسد جوعك،. ماتقلقيش من إنك تتخني لأن كده كده مع الرضاعة بتفقدي وزن.

خليكي حريصة إن أكلك يبقى فيه التالي

- الخضار والفاكهة لأن فيهم فيتامينات ومعادن مهمة.

- الكربوهيدرات زي المكرونة والرز والعيش.

- البقوليات لأنهم مصدر أساسي للطاقة والجسم بيحرقهم ببطء.

- البروتين زي اللحمة والفراخ والسمك والبيض مرتين في اليوم.

- الدهون زي الزبدة وزيت الزيتون وزيت بذر اللفت وزيت جوز الهند لأنهم دهون مفيد فيهم أوميجا ٣ وأوميجا ٦ وده ضرورية لنمو الجهاز العصبي عند الطفل

- الفواكه المجففة زي التين

- المكسرات زي اللوز لأنها فيه ماغنسيوم

- السوايل؛ اشربي ما لا يقل عن ١.٥ لتر يوميًا

- تجنبي المنبهات زي الشاي والقهوة والمشروبات اللي فيها كافيين

أفكار لـ إزاي تعملي وجبة صحية

كورن فلاكس + فاكهة + ١ زبادي + مشروب أعشاب

شريحتين عيش + جبنة + برتقالة + قهوة من غير كافيين

قطعتين بسكوت (خفيف وسهل الهضم) + شريحتين أناناس + كوباية باللبن

نصايح عامة

- العنصر الأساسي اللي بيتحكم في إنتاج اللبن بشكل كافي هو إن ابنك في كل رضعة بيشفط اللبن كله لحد الرضعة اللي بعدها. اللي ممكن تساعدي بيه هو شرب السوايل زي الينسون اللي مفيد جدًا في إدرار اللبن وإنك تبقي مريّحة نفسك على قد ما تقدري نفسيًا وجسمانيًا.

- خدي بالك من الأدوية اللي بتاخديها وخصوصًا أدية الكحة اللي فيها هرمونات منشّطة والمضادات الحيوية. بشكل عام، ما تاخديش أي أدوية في فترة الحمل والرضاعة إلا بعد ما ترجعي لدكتورك.